Қазақ циркінің сахнасында-Ер Төстік

3 года ago admin Комментарии к записи Қазақ циркінің сахнасында-Ер Төстік отключены

20.07. 2017 г. Газета «Айкын», материал Акботы  Исламбек «Қазақ циркінің сахнасында-Ер Төстік».

Қазақ мемлекеттік циркі «Ер Төстік» жаңа лазерлік қойылымын ұсынбақ.  Жаңа қойылым қарсаңында  Алматы қаласы көшелерінде цирк артистері кавалькада шеруі өткізіп, қала тұрғындарын өнерімен тамсандырды. Қазақ мемлекеттік циркінен бастау алған кавалькада Республика сарайына дейін жүріп өтіп, өнерлерін көрсетті. Бұл шараға «Номад» атты-акробаттық тобы, түйелер керуені, эквилибристер, акробаттар, жонглерлар, клоундар және тағы да басқа өнерпаздар қатысты. Цирк ұжымы мұндай кавалькаданы қаланың өзге де аудандарын қамтып, тағы 2 мәрте өткізуді жоспарлап отыр. Себебі, бұл шара қала тұрғындарының цирк әлеміне қызығушылығын оятатыны анық. 

«Ер Төстік» ертегісінің желісінде қойылған жаңа шоуға цирктің барлық артистері қатысып, әртүрлі жанрларды бір сахнада ұштастырумен ерекшеленіп отыр. Қазақ мемлекеттік циркінің директоры Бақыт Бокебаев тұсауы жуық арада кесілетін қойылымның ұрпақ тәр­бие­сінде маңызы зор екенін жасырмады. «Қазақ мемлекетік циркінде осы уақытқа дейін қазақ ертегісінің желісінде не басқа да қазақи қойылымдар қойыл­ма­ған. Сон­дық­тан біз көрермен­дерге, әсіресе, балаларға қызық­ты болуы үшін «Ер Төстік» ертегісін таңдап, арнайы цирк қойылымын дайындадық. Бүгінгі өскелең ұрпақты тәрбиелеуде ұлттық, қазақи дүниелерімізді жаңғыртудың маңызы зор. Сондықтан ертегілерімізді жандандырып, дәріптеудің жолы сахналау деп білемін. Сонымен бірге, осы қойылым арқылы жас­тарды ізденуге, тың дүниелерді бастауға жол ашамыз деп сенемін. Тағы бір ерекшелігі – «Ер Төстік» лазерлік шоу болып сахна­ланбақ. Бір жағынан бұл – биыл елімізде өтіп жатқан EXPO – 2017 көрмесіне тартуымыз. Жуықта артистеріміз EXPO аясында өткен Х Халық­ара­лық «Азия жаң­ғы­ры­ғы» байқауына қаты­сып алтын жүлдені ен­шіледі. Келесі жаңа­лы­ғымыз – Ресей, Венгрия, Бело­рус­сияда өтетін халық­ара­лық фести­ва­ль­дарға шақыру алдық. Со­ған арнайы қойылыммен қатысамыз» деп Б.Бокебаев театр жаңа­лықтарымен де бөлісті. «Ер Төстік» лазерлік шоуы 22 шілдеден бастап 20 тамызға дейін жалғасады.

Ақбота ИСЛӘМБЕК